रौतहट, असोज ७ गते ।

रौतहटमा करिब दस हजार भन्दा बढी कर्मचारीहरुले दशैंको मुखमा तलव पाउन सकेको छैन।

जिल्लाको १३ नगरपालिका र एक गाउँपालिका गरि १४ वटा स्थानीयको खाता कोष तथा लेखा नियन्त्रकको कार्यालय रौतहटले सन्चालन नगरेको कारण हजारौं कर्मचारीहरु दशैमा तलव पाउनबाट बञ्चित भएका छन्।

चाडपर्वको समयमा १५ दिन अगावै कर्मचारीको तलव र दशैं खर्च दिनुपर्ने प्रावधान भएपनि रौतहटमा केही सुरसार देखिएको छैन। संघीय मामिला तथा सामान्य प्रशासन मन्त्रालयले भदौको दोस्रो साता देशभरिका स्थानीय तहमा १७२ जना उपसचिवको सरुवा गरेका थिए।

सोही क्रममा रौतहटको १४ वटा स्थानीय तहमा सरुवा भएको उपसचिवहरु अहिले सम्म हाजिर हुन नसकेको कारण कोषलेखा रौतहटले निमित्त रहेका प्रमुख बाट खाता सन्चान नगरिने अडान लिएपछि समस्या भएको हो।

जिल्लाको दुई गाउँपालिका र १६ नगरपालिकामध्ये एक गाउँपालिका र तीन नगरपालिकामा मन्त्रालयले खटाएको दरवन्दी अनुसारको प्रमुख प्रसासकीय हाजिर भएपछि खाता सन्चालनमा आएका छन्।

तर वृन्दावन, गौर, गढिमाई, माधवनारायण, राजदेवी, राजपुर, मौलापुर, बौधीमाई, देवाही गोनाही, इशनाथ, फतुवा विजयपुर, गुजरा, परोहा नगरपालिका र यमुनामाइ गाउँपालिकाका कार्यरत करिब दस हजार बढी कर्मचारीहरुले दशैमा तलब पाउनबाट बन्चित भएको कोषलेखा रौतहटले जनाएको छ।